Lairam Baptist Khrihfabu Tuanbia
Christian Baptist Missionary pawl cu 1813 kum khan kawl le mon sinah Thawngthabia phuan hram an thawk cang ti a si. 1827 kum cun Rangoon Kala le Tuluk sinah, 1828 kum in Skaw Karen sinah, 1835 kum in Poe Karen sinah, 1838 kum in Pa-o sinah, 1853 kum in Hills Karen sinah, 1856 kum in Asho – Chin sinah, 1860 kum in Shan sinah, 1877 kum in Kachin le Lisu pawl sinah Pathian Thawngthabia an rak chim cang hna nain Lairam ah missionary riantuan pawl an phanh hi cu a tlai deuh suaomau ko. Missionary nungak miss Laura Hardin cu America Baptist missionary society, women department nih Skaw Karen High School, Bassein tuan dingin fial a si ruangah 1883 in 1886 kum tiang a tuan. Tihin Rev. Arthur A. Carson zong American Baptist missionary society nih Asho- Chin sinah Pathian riantuan dingin an fial ve I kawlram a phanh hnu December 20, 1886 ni ah miss Laura he an i thi um. Cu ti cun an nupa in THa-yet khua ah kum 10 chung missionary rian an tuan. Cu tik ah Pathian a thei bak rih lo mi umnak hmun um kha an duh rih caah Chin Hills superintendent Capt. Dury bomhnak thawngin March 15, 1899 ni ah Hakha khua an phan. Rev. A. Carson nih Hakha mangbawi (Tribal Chief- Pu Lian No ) sinah mission hmun a hal i, Hakha khua lai acre 30 cu (Rs. 45) in a cawk. Carson nupa cu Hakha hloh thiam kan duh an ti i, a hmasabik ah India Joseph nih a chimh hna. A hnu ah cun Cia Khawm le Tum Kir nih an cawn piak chap hna ti a si. Hakha hloh an hun thiam deuh hnu cun Sgt Maj. A.G.E. Mewland I.M.S (Hakha nu pa sal) nih 1896 kum lai-ca a rak ser mi zoh chunh in an bet chap deuh deuh ve i, 1900 kum ah sianghngakchia pa 7 he sianginn an dirh kho ti a si. Hihi lairam sianginn hmasabik a si an ti. Rev. A. Carson cu ngandam lo ruangah a mah cawnghramh pah ding le Thawngtha phuan bomh pah ding in Dr. Erict H. East M.D. cu March 21, 1902 ni ah Hakha a hung phan ve.Dr. East cu Hakha ah thla hnih a um in American a nupi a va hruai i, Carson te nupa he rian an tuan ti than. 1903 kum ah Carson te nupa le Dr. East te nupa hna cu American ah kumkhat an vaidin ta. Hi kar caan chung hi Rev. Carson Kawipa, 1906 – 7 kum kengtung hmun um La-hu ca a ser piak tu hna Rev. H.H Tible nih Hakha cu a rak zoh khenh chung ti a si. Carson te nupa le East te nupa Hakha an rak kir than hnu in an hmabaan rian cu an tuan cuahmah lio pi April 1, 2908 ni ah Rev. A. Carson nih a thih tak hna i a nupi Laura nih mission rian cu a run dirpi ti a si. Rev. A. Carson a thih cang ruangah Rev. Joseph Herber Cope le a nupi Elizabeth Smith Cope cu December 12, 1908 ni ah Hakha an phan ve nain Laura he kum hnih chung lawng rian an tuan ti khat i, Tidim ah mission hmun dirh ve ding in an i thial ti a si. Laura Carson nih a pasal nehhnu cu zulh peh ten a run tuan i, missionary riantuan tu pawl caah, cauk pakhat a tial piak hna. Cun Sianginn lei cacawn piak ning zong a cawnpiak ta hna o, inn chungkhar nuncan khuasak ning le zohkhenh ning zong a cawnpiak ta hna pin ah Khrihfa hlabu thar chungin Thawngtha mark, luka, johan le lamhkaltu hna khi Hakha holh in a leh piak ta hna an ti. Cun English – Hakha Dictionary a ser ta fawn i (A Primer of the Lai Dialect of the Chin language) timi zong a ser rih. Hi cauk hi 1909 kum ah Rangoon seh in an tial mi a si i, kan lairam cauk vial te lak ah a hmasa bik a si an ti. Cun Jesuh a nun chung bia ( A Life of Jesus ) ti mi cauk zong 1912 kum ah seh tial in a chuah piak rih hna. Ti-hin Laura Carson cu a ngan dam ve lo ruangah 1920 kum khan a tlung beh an ti.
Rev. I.H. Cope himi hloh thiam fawi phun a si lai, Hakha, Falam, Laizo, Tidim – kamhau ;e sihzang- sigin hloh vial te hi kum thum chung ah a thiam hna an ti. Cauk a ser piak mi hna cu Falam – Laizo hloh in Bible Mathai, Lamkaltu le Korin kuatkhat nak kha 1915 kum ah a chuah, a cauk chuah mi pawl tial dih ah cun a sau tuk lai caah 1914 – 1936 kum tiang ah khan cauk (35) le Khrihfa hlabu (300 Fung) a si i, a cauk ser mi pawl cu 1924 kum in 1971 kum tiang tangcheu in tangli tiang nih rak cawn mi cauk pawl kha an si. Cun Bible biakam thar zong hi 1936 kum ah a chuah. Lairam Baptist mission riantuannak cu a thancho zia, Pathian Thawngtha bia a phanh kum 1899in a kum 6 nak May 11, 1905 ni ah Dr. E.H. East kut in Pu Thuam Hung le Pu Pau Suan cu tipil an ing i, Lairam chungah a hmasa bik tipi ling mi an si an ti. Lairam chungah tipil ing mi minung a karh zia zoh hmanh law, 1908 kum ah cun minung 100 hrawng nih, 1939 kum ah cun minung 4000 hrawng nih, 1949 kum ah cun minung 18000 hrawng nih, 1962 kum ah cun minung 150099 nih tipil an ing cang ti a si. Hi hi Baptist chung lawng si dawh a si. Khrihfabu dang he fonh ah cun a tam chin chin hnga cu mu.
Rev. J.H. Cope nih hin rian a tuan kho tuk i 1924 kum ah ah khan lairam caah Honorary Inspector of Schools’ D.D. degree an pek ti a si. Ti-hin hi tluk rian a tuan kho mi Rev. J.H. Cope cu peng kip a tlawn lio pi ah tihhri-ei ti mi dam lonak nih a tlunh sual i, June 11, 1938 kum khan Hakha ah a din an ti. Cawnak lei zongah Baptist mission cu a hram domh tu an ti ban tuk in 1900 kum ah sianghngakchia pa (7) an um cang kan ti kha, 1905 kum in cun mirang cozah nih Lairam kulh chung sianghngakchia caah tiin Phaisa Rs. 107 a thap ve cang i, 1906 kum ah cun Falam khua zongah Primary sianginn an dirh ve cang. 1910 kum ah cun Lairam chungah Primary sianginn 10 a hung um cang i, bomhnak zong cozah nih Rs. 70 cio in a zamh cang hna. 1913 kum ah cun Mission Middle School of Hakha’ ti mi zong lung Biakinn pawngah khin an hun dirh ve cang ti a si i, sianghngakchia 30 hrawng an tling cang ve an ti. A tawinak in tial ah cun mission dirh mi sianginn a karh chin lengmang i, 1931 kum ah sianginn 31 ahung si, sianghngakchia 5320 an tling cang an ti. 1931 kum ah cun Hau Za Cin Pau zong tanghra a awng ve i, kan Lairam ah (metric pass) hmasa cem a i. 1938 kum ah Saih Luai zong tanghlei li a awng ve i, kan Laram ah (B.A. Pass) hmasa bik a si. 1940 kum cun Lairam ah High School sianginn zong Falam ah a fir ve i Hakha, Tidim, Mindat le Matupi zongah Middile School cu dirh ve chih a si. Primary School tla cun (52) hrawng a hung um ve cang ti a si. 1946 kum a hung phanh ah cun S.T. Hau Go nih tang hlei ruk a hung awng ve i, kan Lairam (M.A. Pass) hmasa bik a hung si kho ve ti a ti. Hnunglei kir in hun tial ta ko ning law, 1914 kum in 1918 kum lakkar lio ah khan Mizoram Presbyterian Biaknak nih Lairam- Seak Khua ah thawngtha bia an rak chim i, sianginn zong an rak dirh ve. Sihmanhseh law kum 4 chung lawng si dawh a si, mirang cozah nih a theih pi ve mi hna a si an ti. Cun lairam sianghngakchia cacawn ning hi khuaruahhar taktak a si mi cu, 1900 kum in 1925 kum tiang kha kawl hloh an cawn ter hna. Sihmanhseh law 1923 kum ah khan Maymyo khua ah “Lairam Sianghngakchia” cacawn ding kongkau ceihmainak meeting an tuah i, Lairam hngakchia pohpoh nih Rom Cafang ( Italian System of Pronunciation of the Roman Character) cawn dih siseh law, a pa hnihnak ah mirang hloh cawn siseh, Hihi 1925 kum in thawk siseh law kawlhloh cawn hi ngol siseh an rak ti an ti. Sihmanhseh law Laimi cu kawl mi he kan i naih deuh ruangah maw a zei ah dik a cunglei an ceihchah cang mi “Education Policy” cu laimi nih duh lo in an rak buai i, kawl hloh tu cawn than a si an ti. Vuangtu Khua sianginn an dirh khi 1923 kum ah, 1930 kum ah Knpalet le Cawng khua khi sianginn an hmu ve. Hi khua thum hna hi mirang cozah nih Rs. 30 cio a rak bomh hna i, riahnak (Hostel) zong a rak sak piak hna ti a si. Lairam chuak cauk hmasa pawl hna hi, vun theih ve a that sual ah “Chin Hymn Book – Siyin Dialect, 1914; Bible biakamthar Tidim hloh in 1932 kum ah, Hakha hloh in 1940 kumah, Falam hloh in 1951 kumah an chuah hna i, Bible cauk pumpi a hung chuah hi cu Tidim hloh in 1977 kum ah, Hakha hloh in 1988 kum le Falam hloh in 1991 kum ah an si. Hi hna hi Baptist mission theipar an si ve kan ti khawh.
Cherchan: Burma & India & Bangladesh – A,Mizo Chanchin, 2001
BRONO KHUK HEI
AMARILLO, TX , US
Ph: (720) 333 1829
