LungKuai Tuanbia 

Nithla hna nih, an liam a fawi
Khirhawk ttha lo, khuacaan hna nih
Hnulei mer zong, an thiam fawn lo
Mansungbik mi, na dawtnak zong
Van minmei bang, ruah lo pi in
Caan sin an liam, an lo ai cang

A dong kho lo, vanraang ka zoh
Dawtnak rawl taam, ti haal ngai in
Kawplo kei lawng, ka vaai zawn ah
Zaatlanglam i, nuam thlaimai in,
Kan len ti kha, zanlei ni bang
Kei thinlung ah, liam thiam tung lo

Lungkuai tuanbia, zaihla tal in
Phuang ve cang ning, ka ti zawn ah
Thinlung mitthli, cat thiam lo in
An luang an liam, thin laifang ah
Thinlung zawtnak, a fah a zual
Tuar thiam a har, thinghmuihma bang
 
 
Dawtnak le tawidornak he,
 
Robert Ngun Sang
Malaysia
______________________________________________________________________________________________________

^^^Thinlung Bawinu^^^(Lainu te….)

Duhnung iang ngei, lainu te aw
Par dawh lak ah, hling ngei lo en
Par ttha hlawn bor, kei cah na si
Miphun dang vaal, taangnem cungah
Duhbia za phaai, thin diriam in
Na tlau sual lai, ti ka ruah ah,
Zan ih mang tiang, merem lo in
Ka phaang tuk tawn, mi nunnem te
Kaan siang hrim lo, sung khun ka far…

Na tta kei cu, vaal santlai lo
An ceih an phaai, an biak chawva
An duh cio mi, na herh ve mi
Sui hlawn phuntling, ngei hlah hmanh ning
Man ngei lo thil, ka ngeihchun chaw
Kan dawtnak hi, na thinlung ah
Cohlang kho law, theithiam law cu
Nun sivaang in, ka innnak khi
Tuar thiam awk tal, ttha deuh ko hnga…

Zanmui tangah, lungkil thli ten
Thlaza ka cam, saduh ka that
Tleng tlengkhat ah, fuu tti ding le
Bor borkhat ah, par tti ding in
Na tta kei lawng, duh tin ka cuai
Kei ka cah cun, lainu nang lawng
Thin hnem kho tu, thinlung sibawi
Vanmi nungak, ian lo lengdawh
Thinlung bawinu, na si zungzal…..
 
Dawtnak le toidawrnak he,
Robert Ngun Sang
Malaysia