Nan ca i ka tinh mi cu kei mah lawng nih ka hngalh
Dear, Zinghmuh Unau zum tu hawi dawt hna a hmasa bik ah nan dih lak Bawipa min in nan kut kan tlaih hna.Bawipa nih nan um nan tthut dir nak le nan um nak cio ah a thluachuah za in pe cio hram ko hna seh. A hmasa bik ah tutan zarh ah a mah biathiang hrawm kho ding in can tha a kan pe tu Bawipa min ka thangtthat. Ka tial palh nak le ka thiam lo nak zong ah zum tu Unau nih nan rak ka ruah piak nak lai zong ka vun in nawl hmasa hna. Kan dih lak ruah tti ding ah ka duh mi cu...
Jeremiah 29:11 Nan ca i ka tinh mi cu keimah lawnglawng nih ka hngalh. Cucu vanchiat nak si lo in,thluachuah nak a si lai.
Jerusalem in Babilon ah Judah mi sal tang mi hna sin ah Jeremiah nih ca a kuat mi kha kan hmuh. Ahme -7 nak kan vun zoh ah cun sal nan tan nak khuapi a tthat nak ding caah, Bawipa sin ah thla cam ko cio ko uh.zeicah tiah a tthat ah cun nan nih zong tthat nak nan hmu ve lai.
Zum tu Unau nihin ni kan um nak cio ram caah biatak te in thlacam cio hi kan rian ngan bik a si ve .kan um nak ram cozah an tthat ah cun a chung um ve mi kan caah tthat nak tam pi a um ve lai. Ahme -10 Babilon ram ah kum 70 nan um hnu ah Jerusalem ah kan kir pi than hna lai. Zumtu U nau a tu sal dir hmun in kan phak cio nak le kan um nak ram ah hin zungzal um ding cu Bawipa nih a kan tinh piak mi a si hrim lai lo. Kan chuah nak kan ram ah a kan kir pi tthan te ko lai. Vawlei cung ah a niam bik dirhmun in ramdang kan phak mi le rethei zawnzai ,lungleng le um har in ramdang ah kan Bawipa nih a kan phak ter nak a chan cu, hmailei kan khua kan ram caah thil ttha tam pi kan chuah pi khawh nak hnga ding le kan ram le kan mi phun caah fim nak a chuah pi tu kan si khawh nak hnga ,Bawipa nih a kan um ter chung mi kan si.
Cu caah kan um hmunle ram cio ah a mah Bawipa ttihzah te le zei dah tuah hna seh ti a kan duh ti hi ruat bu te in ,a mah hmai ka ah kun zungzal cio ko hna u si. Ni khatkhat cu Bawipa nih kan au nak aw a kan leh can a phan te lai i, kan ram le kan mi phun sin ah lunglawm te in kan kir pi tthan ko lai.
Bawipa nih nan ca ka tinh mi cu keimah lawnglawng nih ka hngalh i, Cucu vanchiat nak si lo in thluachuah nak tu a si lai .
A ttha mi um ah cun kan dihlak caah Bawipa nih Thluachuah kan pek piak ko seh.