A Thothan Mi Pum
(Luke 23:26ff; 1Cor 15)
Zinghmuh Careltu sin ah Thawngtha chim nan ka thiah than caah kaa lawm. Mah le inn ah Internet a ngei lomi Internet dawr ah kal in sermon tibantuk catlang saudeuh tial cu a har ngaimi a si caah a tawite in chim kaa zuam lai.
Kan Baibal cauk hi a hramthawk in a dongh tiang tha tein rel tik ah biafang biapi khunmi tete (keyword) an um. Cu cafang hna lak ah a biapi ngaimi cafang pakhat cu ‘Nunnak’ ‘Life’ tihi a si. Cu nunnak kan timi cu amah lawng in a um khomi a si lo caah ‘Pum’ he then lo tein an I pehtlai. Eden dum ah Pathian nih tlak in Adam a ser ahkhan a hnar in nunnak thaw a pek hnu ah minung ah a hung cang (Gen. 2:7). Pum le nunnak cu then awk a tha lomi an si i nunnak a ngei lomi pum cu mithi tiah auh a si i santlaihnak zeihmanh a ngei tilomi a si. Cu pum le nunnak cu hmunkhat teah dawhte in thanterding cu Pathian nih a kan timhpiakmi a si. Asinain cu aa pehtlai pengmi kan pum le kan nunnak cu zungzal in hmunkhat teah umtiding hi Pathian saduhthah a si fawn lo. Kan taksa kan pum cu thih in a kan sernak leidip ah kir than ding le kan nunnak cu a kan petu Pathian sin ah kirthanding in a kan ser.
Kan Bawipa Zesuh Khrih hi Pathian fapa a si ko nain minung fapa zong a si ve caah a pum hi thiding hrimhrim a si ve. Atu zarh bantuk Good Friday hna ah kan bawipa thihnak kong, Peter nih kan dawttuk ati ko buah a zuarnak kong, a phunphun in sual an puhnak kong, a rit ngaingaimi Vailam tung an putter nak kong, Vailam cung ah a sual lo nain an thlainak kong, misual pawl an chinh tawnmi hling luchin an chinhnak kong, ahohmanh nih din duh lomi tithur an dinhnak kong, thah sawhsawh hmanh siloin a kut le a ke ah thir an khenh hnu ah a hnak ah fei in an chunhnak kong, minung fa a sive bantuk in hrum ruangmang in a thihnak kong tehna cu rel le chim caan, hi Pa nih vanlam cung ah a thihnak a kong le a sullam ruahthan caan a si. Hi Good Friday nihi kannih pakhat cio zong kan thih ni a si a herh. Kan pum cun kannung rih ko nain kan pum taksa nih a ngeih tawnmi ruamkainak, nakchuahnak, ziarngeihnak, hakkauhnak, mah le mah i upatnak le midang zeirel lonak, midang dawt khawh lonak, mahca lawng nun duhnak, lung puamnak, nun thianhlim lonak, mi kong caihnak vialte vailam ah khenh chih in a thimi pum kan si ding kan i hngalhthan caan a si awk a si.
Pathian sermi kan pum cu a thiding a si nain kan nunnak cu a thi khomi a si lo caah a kan petu Pathian sin ah a kirthanding a si. Vawlei i thlaici na tuh tikah a thih hmasa lo ahcun a keuh tung lo (1Cor15:36). Zesuh Khrih thawhthannak nih kannih zong kan nunnak a thothanding kan sinak a langhter ve. Zesuh Khrih a zummi ka si bantuk in ka pum ka nunnak hi vawlei in a liam ahcun kan nunnak taktak cu thi loin ka zumhmi ka Pathian sin ah zungzal nunnak a co lai tihi hngalh le fian a herh ngaingai mi a si. Asinain eternal life, abundant life kanti mi hna hi thihhnu lawng ah a thar tein va co teding le va hmuh teding mi nunnak an si bal lo. Zesuh Khrih nih a nun lio hrimhrim in a kan cawnpiak mi lungput le nunnak: dawtnak, zawnruahnak, lungsaunak, mi zaangfahnak lungthin a ngeimi, thawhthan nun aa thawkcang mi hna nih pehzulh in va nun rihdingmi nunnak tukhi a si.
Atu kan pum in kan nun rih lio can ah a thothan mi pum kan si a herh. Kan pum le nunnak then awk a tha lai lo. A thothanmi pum nih thawhthan nun a ngeih ve. Vawilei mi kan sinak kan pum a thih lawng a za lo a thothanmi pum kan si a herh. A thothanmi Zesuh cu Galilee ah hmai ah a kal i riantuan aa thawk than cang.
Kannih Chuncung pawl hi kan zia thalo tete an um theo. Patlung nih nupi vuak tehna, volhpamh tehna, nupi maak tehna, rian tuan loin zudin tehna le nutung pawl nih vale volhpamh tehna, fale vuak tehna, chiatserh tehna, khuateh tehna, fale sianginn phuakter tehna etc… an si. Ramdang phanmi cheukhat zong hi khuate I an rak um lio bantuk in sining thalo a thlau kho lomi an um anti. Zesuh nih kan sining thalo hi kaltaak I sining thar a thothanmi sining hrukter a kan duh. Atu lio Chuncung khua a hlummi hna zong hi kan dihlak in Khrihfa le kan kaa cun mi hrinthan, mi piangthar kan si kan ti dih ko nain kan pupa chan lio nunning le sining in kan nung peng rih. Kan lothlawhning tehna, kan thilphurhning tehna, kan rawl ei le kan sazawh tehna, kan thing hlam te hna, kan meiduah tehna, kan I leenkai ning tehna, tlangrian kan tuanning tehna, kuli thingpheng kan I pekning tehna, khuabawi tlangpi nih kumkhat ar khat ar an kan tlaihning te hna, kan khuahauh tehna, innlak I kan I vuakning tehna, sianginn kai kan duh loning tehna zohtik ah a thothan mi nunning, a hrinthan mi nunning cu kan si hnga maw tihi ka ruat tawn. TV, Video, Telephone Mei tibantuk in kan thanchonak tete pahnih khat a um nain kan nunning taktak cu kan pupa nunning theu kan si ko rih. Zesuh Khrih thihnak le thawhthannak kong nih kan nunnak taktak a remh lawng ah kan sining dihlak in a thothanmi pum nih a ngeihmi singning in kan nung ve lai. Thawngtha a ngaimi dihlak Bawipa nih thluachuah in pe hram hna seh.
Rev.Tluangceu
Hakha
Zinghmuh Careltu sin ah Thawngtha chim nan ka thiah than caah kaa lawm. Mah le inn ah Internet a ngei lomi Internet dawr ah kal in sermon tibantuk catlang saudeuh tial cu a har ngaimi a si caah a tawite in chim kaa zuam lai.
Kan Baibal cauk hi a hramthawk in a dongh tiang tha tein rel tik ah biafang biapi khunmi tete (keyword) an um. Cu cafang hna lak ah a biapi ngaimi cafang pakhat cu ‘Nunnak’ ‘Life’ tihi a si. Cu nunnak kan timi cu amah lawng in a um khomi a si lo caah ‘Pum’ he then lo tein an I pehtlai. Eden dum ah Pathian nih tlak in Adam a ser ahkhan a hnar in nunnak thaw a pek hnu ah minung ah a hung cang (Gen. 2:7). Pum le nunnak cu then awk a tha lomi an si i nunnak a ngei lomi pum cu mithi tiah auh a si i santlaihnak zeihmanh a ngei tilomi a si. Cu pum le nunnak cu hmunkhat teah dawhte in thanterding cu Pathian nih a kan timhpiakmi a si. Asinain cu aa pehtlai pengmi kan pum le kan nunnak cu zungzal in hmunkhat teah umtiding hi Pathian saduhthah a si fawn lo. Kan taksa kan pum cu thih in a kan sernak leidip ah kir than ding le kan nunnak cu a kan petu Pathian sin ah kirthanding in a kan ser.
Kan Bawipa Zesuh Khrih hi Pathian fapa a si ko nain minung fapa zong a si ve caah a pum hi thiding hrimhrim a si ve. Atu zarh bantuk Good Friday hna ah kan bawipa thihnak kong, Peter nih kan dawttuk ati ko buah a zuarnak kong, a phunphun in sual an puhnak kong, a rit ngaingaimi Vailam tung an putter nak kong, Vailam cung ah a sual lo nain an thlainak kong, misual pawl an chinh tawnmi hling luchin an chinhnak kong, ahohmanh nih din duh lomi tithur an dinhnak kong, thah sawhsawh hmanh siloin a kut le a ke ah thir an khenh hnu ah a hnak ah fei in an chunhnak kong, minung fa a sive bantuk in hrum ruangmang in a thihnak kong tehna cu rel le chim caan, hi Pa nih vanlam cung ah a thihnak a kong le a sullam ruahthan caan a si. Hi Good Friday nihi kannih pakhat cio zong kan thih ni a si a herh. Kan pum cun kannung rih ko nain kan pum taksa nih a ngeih tawnmi ruamkainak, nakchuahnak, ziarngeihnak, hakkauhnak, mah le mah i upatnak le midang zeirel lonak, midang dawt khawh lonak, mahca lawng nun duhnak, lung puamnak, nun thianhlim lonak, mi kong caihnak vialte vailam ah khenh chih in a thimi pum kan si ding kan i hngalhthan caan a si awk a si.
Pathian sermi kan pum cu a thiding a si nain kan nunnak cu a thi khomi a si lo caah a kan petu Pathian sin ah a kirthanding a si. Vawlei i thlaici na tuh tikah a thih hmasa lo ahcun a keuh tung lo (1Cor15:36). Zesuh Khrih thawhthannak nih kannih zong kan nunnak a thothanding kan sinak a langhter ve. Zesuh Khrih a zummi ka si bantuk in ka pum ka nunnak hi vawlei in a liam ahcun kan nunnak taktak cu thi loin ka zumhmi ka Pathian sin ah zungzal nunnak a co lai tihi hngalh le fian a herh ngaingai mi a si. Asinain eternal life, abundant life kanti mi hna hi thihhnu lawng ah a thar tein va co teding le va hmuh teding mi nunnak an si bal lo. Zesuh Khrih nih a nun lio hrimhrim in a kan cawnpiak mi lungput le nunnak: dawtnak, zawnruahnak, lungsaunak, mi zaangfahnak lungthin a ngeimi, thawhthan nun aa thawkcang mi hna nih pehzulh in va nun rihdingmi nunnak tukhi a si.
Atu kan pum in kan nun rih lio can ah a thothan mi pum kan si a herh. Kan pum le nunnak then awk a tha lai lo. A thothanmi pum nih thawhthan nun a ngeih ve. Vawilei mi kan sinak kan pum a thih lawng a za lo a thothanmi pum kan si a herh. A thothanmi Zesuh cu Galilee ah hmai ah a kal i riantuan aa thawk than cang.
Kannih Chuncung pawl hi kan zia thalo tete an um theo. Patlung nih nupi vuak tehna, volhpamh tehna, nupi maak tehna, rian tuan loin zudin tehna le nutung pawl nih vale volhpamh tehna, fale vuak tehna, chiatserh tehna, khuateh tehna, fale sianginn phuakter tehna etc… an si. Ramdang phanmi cheukhat zong hi khuate I an rak um lio bantuk in sining thalo a thlau kho lomi an um anti. Zesuh nih kan sining thalo hi kaltaak I sining thar a thothanmi sining hrukter a kan duh. Atu lio Chuncung khua a hlummi hna zong hi kan dihlak in Khrihfa le kan kaa cun mi hrinthan, mi piangthar kan si kan ti dih ko nain kan pupa chan lio nunning le sining in kan nung peng rih. Kan lothlawhning tehna, kan thilphurhning tehna, kan rawl ei le kan sazawh tehna, kan thing hlam te hna, kan meiduah tehna, kan I leenkai ning tehna, tlangrian kan tuanning tehna, kuli thingpheng kan I pekning tehna, khuabawi tlangpi nih kumkhat ar khat ar an kan tlaihning te hna, kan khuahauh tehna, innlak I kan I vuakning tehna, sianginn kai kan duh loning tehna zohtik ah a thothan mi nunning, a hrinthan mi nunning cu kan si hnga maw tihi ka ruat tawn. TV, Video, Telephone Mei tibantuk in kan thanchonak tete pahnih khat a um nain kan nunning taktak cu kan pupa nunning theu kan si ko rih. Zesuh Khrih thihnak le thawhthannak kong nih kan nunnak taktak a remh lawng ah kan sining dihlak in a thothanmi pum nih a ngeihmi singning in kan nung ve lai. Thawngtha a ngaimi dihlak Bawipa nih thluachuah in pe hram hna seh.
Rev.Tluangceu
Hakha
