ZEIRUANGAH DAH MITTHALO TU AN THANCHO I MITHA TU AN TUMCHUK?
BIBLE: SALM 73
Biahmai ti
Salm 73 cu Asaf nih Thiang Thlarau lamhruainak tangah a tialmi a si. Amah cu David chan lioah Temple hlasatu, levi miphun a si. Salm 73 nih a tlangpi in a chimmi cu, “ Pathian hi a thami le a dingfelmi a si ah cun zei ruangah dah mi thalo tu an thancho i mi dingfel tu nih harsatnak phunkip an tuar?” ti hi a si. Nitin na nunnak ah hi biahalnak hi a hung chuak `heo ve ko lo maw? Zeiruangah dah a si hnga?
1. Biatak: Asaf nih a bia a domhnak cu “Pathian hi Israel mi hna cungah a ṭha taktak ko, lung thiang a ngeimi hna cungah a ṭha taktak ko.”(v. 1) ti a si. Pathian hi zumtu ami hna kan cungah a tha taktak ko timi hi al awk a tha lomi le ai thleng bal lomi biatak a si.
2. Lunghrinhnak: Asaf nih Pathian a thatnak a chim ko nain a lunghrinnak bia zong hiti hin a von peh, “Sihmanhsehlaw kei cu ka rak tlu dengmang, ka rak nal dengmang” (v. 2) tiah a ti. Aruang cu, “ zeicahtiah miṭhalo hna an huncho kha ka hmuh i an i porhlawt kha ka theih tikah cu nih cun ka nah a ka chuahter” tiah a ti. Vawleicung thil kalningah “ mithalo nih harnak an tong i mitha nih thlluachuah an dong” timi bia hi cu cohlan tlak ngai asi nain “mitha lo nih thluachuah an dong i mi`ha tu nih harnak an tong” timi hi cu cohlan awk a har ngaimi thil le nahchuah awk tlak ngai a rak si ko. Asaf zongnih a nahchuahnak bia hiti hin a von peh; “Annih cu fahnak zeihmanh an ing lo, an ngan a dam i an ṭhawng. Midang bantukin harnak zeihmanh an tong lo, midang bantukin temhinnak zeihmanh an hmu lo. Cucaah cun ruamkai kha ṭhi bantukin an i oih i puarthau cu puan bantukin an i aih….. Vancung i a ummi Pathian kha an thangchiat i vawleicung i a ummi minung kha an duhduh in an ti hna. Cucaah cun Pathian mi hmanh nih an merhnawh hna i an chimmi paoh kha an zumh dih… Thil tampi an ngei i an ngei chin luaimai.”(v. 4-12) tiah a ti.
3.Biahalnak: Asaf nih biahalnak a von tuahmi cu, “ A si kun ahcun, thiang tein nun kaa zuam i ka kut in sualnak tuah lo kaa sum hi pakpalawng maw a si ko lai? Pathian, chun nitlak in harnak na ka inter i zing fate in dan na ka tat…..” (v. 13-14) tiah a ti. Khatlei khel in von chim ah cun: zeiruangah dah mi`halo tu an thancho luaimai i kei tu harnak na ka inter? Ka dinfelnak nih hin miatnak zeital a chuahpi lo maw?.. ti asi.
4. Hmuhfiannak: Asaf nih lenglei i a caangmi thil a cuanh tikah Pathian thatnak a lunghrinh hmanhsehlaw, Pathian biakin chungah a luh i Pathian a cuanh tikah Pathian nih a hmanmi hmuhning a pek than; “na biakinn chung i ka luh tik ceo ah” (v. 17)
a. Mi thalo hna `hanchonak cu khikkhatte lawng a nguh i an donghnak cu tih a nungmi a si: “miṭhalo hna cungah zeidah a tlung lai ti kha ka hngalh…. Chikkhatte ah an rawk i an donghnak cu ṭihnung ngaingai a si. Bawipa, annih cu zanmang bantuk an si, na hun i hlauh tikah annih cu an lo colh.”( v. 18-20)
b. Mi thalo hn ruangah Pathian thatnak ka rak lunghrinh kha ka rak hrut hringhran dah, saram lenglo ka si (v. 21-22), asinain kei cu Pathian kut chung teah ka um in a ka hruai zungzal caah ka donghnak cu upatnak he a si lai. Vancung ah khin nangmah hlei in ahodah ka ngeih? Nangmah kan ngeih cang caah vawlei ah hin zeidah ka herhmi a um? (v. 25). Unau.. vawleicung thil ah thancho luaimai i Pathian ngeih tung lo hnakcun Pathian Pakhat ngeih i zeidang ngeih lo hi a tlam a tling deuh ko lo maw?
Biatlangkawmnak: Na pawngkam ah zum lotu pawl an thancho luaimai i zumtu pawl tuk vanchiatnak nih a kan den tikah Pathian `hatnak na lung hrinh hlah. Pathian tu kha zoh ko. Zeicah tiah zum lotu hna thanchonak cu vawlei cung an nun chung ca lawng a si i an donghnak cu Hell a si. Zumtu nang le kei bel “Hi vawlei ah hin kannih caah zungzal hmun ding khua a um lo, a ra laimi khua tu kha kan cuan” (Hebru 13:14).
Ka pum le ka ruahnak cu zorchuk hna hmanh seh law Pathian kha ka thazang a si; amah lawnglawng kha ka herhmi cu a si ko.(v. 26) Bawipa ni a Bia hmangin thluachuah in pe hnai ko seh! Amen.