Zomi miphun(clan) hi Hakha-Thantlang-Falam nih 'Tidim' kan ti hna. A hlan lio ah Lusei pawl nih 'Paite' an rak ti hna i a tu mizoram minung hna zong nih 'Paihte' an ti lan hna. Paite timi cu "a rak kal chung" tinak asi i (Sukte) an ti hna zong khi *kal chuak 'or' khua-tli tinak asi. An umnak hmun cu Tidim-Tonzaang pengkulh le Kalaymyo pengkulh ah an tam bik i India Tripuraram, Mizoram le Manipurram zongah an um rih ve. Manipurram um Tidim pawl nih 1948 kum ah khan, "Paite Nalional Council' an dirh i an political party pawl nih India cozah sinah an halmi (Scheduled Tribes) cu 1956 kum ah a pom piak hna. Zomi 'or' Tidim pawl an tuanbia ahhin an pupa chuahsemnak Eden-hmun *Cimnuai* kong a tam ngai i Kabaw-valley in a tu an umnak hmunram an rak panh hna lio ah chikhnih-chikthum in phu um dawh an si. Cimnuai a phan hmasa bik phu cu Thuamvun tlang in (Kenedy peak) hrawng in Thuklai khua ah, Zampitam hmun le Saizaang hmun hrawngin Cimnuai a phanmi phu an ti hna i Kabaw Valley an chuahtaak lio kum hi AD.1300 hlan deuh ah tuak an si. Zomi chungah hrinphunmin 'or' pengmin(sub-clan) in Vuite=Guite, Ngaihte, Teizang, Sukte, Sizang=Thaute, Khuano, Saizaang, Vaiphei, Baite, Gangte=Rangte le Zo=Yo hna hi an si. An phun min (sub-sub clan) incun a tampi. Hi Tidim chungah *Hau Cin Khup 'or' How Gin Khup 'or' Hao Jin Khup* timi pa hi 1888 kum Mirang-Mizo ral(Lusei-Britist second war) lio ahkhan mirang ralkap a rak dong tu hna asi. Curuangah mirang nih Lairam(Chin Hills) a laak hnu 1893 March 6 ni ah B.S.Carey, Chin Hills Political Officer nih Fort White in " Hao Cin Khup cu a rak uk ciami khua(23)pinah a dang khua (100) zong uk chih seh" tiah nawl an peknak asi. Zomi hi 1983 kum milu relnak ah Burma ram chung ummi (68000) ah an tuak hna i hmun dang ummi pawl he tingkhat(100000) leng an kai dimdiam lai tiah zumh an si.