Khumi miphun(clan) hi an mah pawng um Arakenes le Mongh miphun pawl nih Kha-mi, Kha-mui an ti hna i an mah nihcun *Ku-mi* an iti ve. Hi miphun chungah Arakenes pawl nih "Miu" tiah an auh hlei mi hna a vun um rih i, an mah nih cun *Kha-mi* an iti ve hoi. Curuangah catial tu tam deuh nih an fonh hna i Miu-Khumi min an put nak asi. Miu miphun hi a tu Mizo pawl nihcun "Miria" an ti hna i, A hlan Lusei pawl nihcun "Marung" an ti ve hna. Hi miphun tuanbia a ttial tu hna pawl nih an hman mi spelling a tam pah i Kha-mi, Ku-mi, Kha-mui, Khu-mi, Miria, Marung, Mru, Miu, Myo(kumi) Mro, Mrus tiah an ttial hna tikah *Kachin miphun(nation) chung um 'Muru' miphun(clan)* he theih palh sual a fawi phun te asi. Miu-Khumi pawl umnak hmun hi a tlang pi'n hmun thum ah an then. A pakhatnak cu " Northern Arakan District le Arakan Hill Tract asi i Kawl pawl nih *A phya Khumi* an ti hna. A phya Khumi pawl hi 1901 kum milu relnak ah 20682 hrawng an si i Arakan tlanglei taw-zum Akyab District ah khin *Awa Khumi* an timi hna he, an dan hna caah Awa khumi pawl cu milu 1469 lawng an si. A pahnihnak cu a tu Chin-state Paletwa pengkulh chung um an si i 1988 kum lio ah milu 62000 hrawng an si ve. A pathumnak cu Bangladesh ram Chittagong Hill Tract asi i 1901 kum milu relnak ah 10540 an um ve ti asi. Cun "Kolodine river=Kaladan tiva" kamzel hrawngah tlawmpal tete cu an um rih fawn. *Kaladan*sullam a fiang lomi nan um sual ah (kala=foreigner=ram dangmi, dan=place=hmun) tinak asi. Kaladan tiva cu a luannak hmunhma zawn zulh in auh nak min ai dang cio i "Chuncung ram chungah Timit-va, Hakha lonh in Bawinu-va, Miram zawn in Beinu-va, Mizo ram zawn cun Chimtuipui an ti i Kanpalet hrawng cun Yangpang tiah an ti*. Yangpang timi hi mirang pawl nihcun Jangpang tiah an tial i Kaladan tiva min an ti duhnak asi.